من أنا
- حلم الأمومة
- مدونة عربية تهتم بتأخر الإنجاب والحمل والولادة وستحوي إن شاء الله على كل جديد ومفيد
أنت الزائر رقم
عدد الزوار
حملت بعد 28 سنة (الجزء الثالث)
2:48 م | 
مرسلة بواسطة
حلم الأمومة
نستكمل...........
قلت لها لا والله مادريت والله يوفقهم
هنا حسيت قلبي بيتقطع على نفسي
زوجي كان طااااااير من الفرحه وكان يقولي والله هيه طيبه والله
كمان تقول الولد اللي راح اجيبه لك انو ولدها قبل لا يكون ولدي
قلت له ليه هوه هديه يوم تقول ولدها قبل لا يكون ولدي !!!
هنا زوجي طلع المستاجرين اللي فوق وسكن العروسه ام ولي العهد المنتظر
انا قلت له لا اعرفها ولا تعرفني
هو وافق هنا
انا الى الان ماعمري شفتها
صار الرجال مو معاي خلااااااااااص قلبه وروحه معلق فوق في الدور الثاني
وكبر حملها وكل يوم يكبر تعلقه وفرحته فيها
يوم من الايام جاءني يقول لي اليوم رحنى المستشفى سوينا اشعه
وشفنا الجنين كان يتحرك واول مره نشوفه يتحرك
عارفه يارحمه تمنيت انو هذا الولد لي انا وانتي!!!
وانا غاصه بعبرتي والحزن ملا قلبي
انتهت التسعه اشهر وجاء ولي العهد وكان يووووم كله فرحه وجوال زوجي ماوقف من المباركين
ورحمه ؟؟؟
رحمه منكسره مهمومه حزيييينه على قدرها
باركت لزوجي وبكيت وحضني وقال والله يارحمه هذا الولد ماراح ينسيني العشره اللي بينا
الولد هذا مابيغير حبي لك
وانا منهاره ابكي
المهم زوجي صار لمن يجيني في ليلتي كان بس يبغى يقضي يومه ياعلى النت يا على التلفزيون
يبغى اليوم يمشي بسرعه عشان اليوم اللي بعده يروح لزوجته وولده الله يحفظه له
كان يجيني بس مثل اللي يسكتني يعني انا جيتك اليوم لا تزعلين
كبر الولد وصار عمره 7 اشهر وعمري ماشفته حتى صوره بجوال زوجي ماعمري شفتها
مو كره للولد لا والله هو طفل ماله ذنب
بس عشان مايتقطع قلبي ولا اتعلق فيه
كنت اسمعه يبكي واحزن لعمري
جاء يوم ربوع وكان اليوم فيني
دخل زوجي الساعه 5 ونص العصر وكان بيده طفل جميل دبدوب لابس بربتوز لونه احمر
وكان الولد ماسك في قميص ابوه حق العمل
دخل وقال يارحمه وانا اطالع في الولد
الولد طالع فيني وقام يبكي
تنكر مني
انا ابكي والولد يبكي
قال هذا عبدالله ولدي وولدك بعد
مابتتشيلينه
جيت اشيله والولد قام يصيح بزياده تنكرني بزياده
بوسته وهو على كتف ابوه وقلت خلاص طلعه لامه لا تسمعه يبكي تقول وش سوت لولدي هذي
طلع من هنا وانا من هنا منهاره كالعاده
يوم كمل الولد 9 اشهر قال زوجي انو امه حامل بالثاني
يوووووووووووووه هنا خلاص طاح كرتي عند زوجي
لمن صارت بالرابع وولدها كمل سنه انا هنا كلمت امي واخواني وقلت خلاص مالي عيشه معاه
كم بقى من العمر انا برجع لك يايمه
صار اللي صار ومناقشات وهواش لا مابطلق الا طلق لحد ماطلقني وارتحت
رجعت بيت امي بعد زواج 26 سنه بدون اطفال
امي كانت مريضه كانت تغسل كلى رحمة الله عليها
جلست في بيت امي 7 شهور فقط وتوفت الله يسكنها جنات النعيم
هنا حسيت الدنيا سودت في عيوني لا اب ولا ام ولا زوج ولا عيال
هنا صار عمري 46 سنه
رحت لاخواني عشت معاهم
كانو يعاملوني مثل امهم مو اخت لهم
بعد سنه من موت امي تقدم لي رجل عمره 64 سنه
ماتت زوجته وعياله متزوجين يبغاني اكون له عون في الحياه بس
انا هنا ترددت واخواني قالو لا احنا مو عجزانين عنك
نعطيك هذا الشايب ويموت وترملين عليه خليك كذا احسن لك
انا استخرت الله ووافقت عليه
قلت اكسب فيه اجر واشيل همي من قلوب اخواني
تزوجت وكان في قلبي حزن على قدري اني اعيش من غير اطفال
وفعلا لو يموت زوجي وارجع لاخواني ارمله من بعد ماكنت مطلقه
زوجي طيب معايا ومريض سكر وضغط وكرسترول
وانا مريضة سكر الحمد لله رب العالمين
الدوره كانت ملخبطه عندي يعني مره تجي وعشره لا
قلت اكيد تبغى تقطعني عشان كذا تجي شهر وتجلس 7 و8 شهور ماتجي
جاتني الدوره قبل زواجي بـ 6 شهور ولا زدت شفتها
بعد زواجي بثلاث شهور من الشايب الله يطول بعمره
حسيت بالم في اسفل بطني مغص مثل الدوره
والم بصدري وحراره استمرت اسبوعين
قلت بسس هذا اعراض مرض خبيث ولا شي اعوذ بالله من الشيطان الرجيم
صبرت اسبوعين والشيطان يلعب براسي
وقلت لزوجي وخاف علي قال يلا بوديك المستشفى
رفضت رفضت
واخر شي وافقت من خوفي
رحت المستشفى لدكتورة النساء
قلتلها الاعراض طبعا هيا اخذت معلمومات عني في كل شي عمري
وكم سنه متزوجه وهل عندي اطفال وش سبب عدم الانجاب
قالت اطمني ان شاء الله خير
قالت لي هما الحريم كذا لمن تبغى الدوره تقطعهم
قالت اشربي مويه كثير وتعالي اسوي لك اول شي سونار
طلعت من عندها وطنشت رحت البيت وقلت لزوجي انا متوكله على اللي فطرني
مابغى اخوف نفسي
وجلست اسبوعين ثانيه نفس الاعراض وكمان جاني فقدان شهيه للاكل
رجعت لدكتوره وانا شاربه مويه جاهزه قلت لها هيا سوي السونار
قالت وين رحتي اشبك خرجتي مارجعتي لي قلت انا خايفه ومدري ايه
واتكلم معاها وهي بالسونار على بطني اقولها انا ربي كاتبلي الشقاء يادكتوره
قالت فرج الله قريب يابنتي
بس هذا اللي قالته لي
راحت على مكتبها وسوت لي ورقه قالت هذا تحليل روحي سويه
رحت المختبر وقالت لي السستر اللي تسحب عينة دم مدام حامل؟
انا قلت لا بكل برود
وسكتت
قالت النتيجه بعد ساعه
خرجت بالاستراحه وجلست سوالف مع الحريم
بعد ساعه جاء زوجي يناديني ويقول لي ادخلي ادخلي لدكتوره وهو يضحك كذا في عيونه فرحه
دخلت لدكتوره وقالت لي مبرررررروك يارحمه انتي حامل اهو في حمل
ورب الكعبه حسيت قلبي يدق يدق يدق وحسيته يدق ببطني وحسيت بدوار براسي كذا
شعور غرررررررررررررريب
قلت كيف حامل؟؟؟
قال ازاي كيف افهمك يعني ولا ايه وتضحك
وانا اقلها وضعف المبايض وانسداد الانابيب؟؟
وكيف احمل وانا عمري 47 سنه
قالت ارادة الله
اذا ربي اراد شي يقول له كن فيكون
لا اله الا الله
قمت اسلم على ايديها وابكي ابكي ابكي
واسيب الدكتوره واطلع لزوجي بالسيب واقف وفيه رجال واسلم على ايديه وابكي
واقوله تعال شف الدكتوره وش تقول وهو عارف اني حامل قالو له بالمختبر
طبعا دخل معاي والدكتوره انصدمت انو هذا الرجل اللي انا حامل منه لانه شايب
ههههههههههههه
قالت مبروك المدام حامل
هو قال الحمد لله والشكر لله اللهم لك الحمد
شفتي يارحمه ربي رحمك وعوضك
وانا شغاله بكي
قالت بس في شي بقووله لكم
وشو ؟
قالت السكر
السكر له اثار كثيره على الجنين ولازم الان اعطيك تحويل على قسم الباطنيه ولازم تنويم
رحنا الباطنيه ونوموني ونظمولي السكر
واعطوني بدال الحبوب ابر انسولين
بعد اسبوعين رجعت لدكتوره وسوت لي سونار وسمعتني صوت قلب النونو
يووووووووه هنا بطير من الفرحه واتذكر امي رحمة الله عليها نفسي انها عاشت فرحتي
رحت البيت قلت لزوجي بعلم اخواتي واخواني بحملي
قال لا انتظري
والله انتظرت ولمن دخلت الشهر الرابع علمت اخواتي وهم قامو بالمهمه نشرو الخبر
بس فيه ناس ماصدقت اني حامل بعد هذا العمر
تم حملي ولله الحمد بعد جهاد وعلاجات لسكر وحميه وتخويف الدكاتره الجنين فيه وفيه
مرت الشهور مثل السنين
بدئت احس بحركة النونو ببداية الرابع مثل الغازات كذا او الرعشه
ومومصدقه
رحت لدكتوره وورتني هوه يتحرك ببطني يلعب وحواليه مويه
وتذكرت فرحت زوجي الاول لمن شاف ولده يتحرك ببطن امه ولمت نفسي اني انقهرت وبكيت ليه مافرحت له؟؟
اخيرا حسيت بالشعور اللي يحسون فيه الحريم
اللهم لك الحمد يارب
بدا بطني يكبر وفرحتي تكبر معاه
بديت اشتري ملابس حمل اللي طول عمري امر من جنبها واقول الله يعلم هل بيجي يوم البسها؟
بدا بطني يكبر زياده
اوقف على الغساله ابي اتوضا واطالع في بطني مو مصدقه انا سرت كذا؟
اطالع في بطني قدامي وصارت حركات النونو تبان
اجلس على الكنبه واطالع ببطني واحمد الله
كنت اطالع بالحريم اللي حوامل واقول كيييييييييف؟؟
كيف يحملون ياربي؟
كيف يحسون في شي ببطنهم يتحرك ؟
انا الحين سرت مثلهم
اتذكر مره شفت حرمه شحاذه بالشارع حامل تطلب فلوس وكان يدور ببالي اقول كيف حامل هذي كيييييييف؟
حتى الشحاذين يحملون وانا لا
استغفر الله العظيم بس من كثر مافي قلبي من حزن وشغف للحمل
بديت اجهز لنونو من يوم قالو لي ولد بالشهر السادس
الله مو مصدقه
اخيرا سرت ادخل هذي المحلات حقت الاطفال واشتري وانا واثقه
الف حمد وشكر لك يارب
كانت هذي المحلات ممنوعه انيادخلها بس اطالع من برا فيها
كنت ما اصدق وحده تولد واقول لزوجي يلا نجيب لها هديه
بس عشان ادخل محل الاطفال واجلس اتفرج واتخيل اني اجيب هذي الاغراض لولدي او بنتي المنتظر
الحين اشتري وانا فرحانه
جهزت كل شي لنونو وجهزت لي انا بعد اغراض لنفاس
دخلت الشهر التاسع جلست 3 ايام بس وقرر لي عمليه الدكتور استشاري
قال البيبي بدا يكبر وانتي معاك سكر وكمان حمل عزيز لازم نخرجه قبل لا يصيبه مضاعفات
هنا بديت اخاف مو على نفسي لا والله على ولدي
هل بيطلع طيب وبخير؟
هل بيطلع سليم مافيه اعاقات؟
في 22\8\1428
هذا اليوم اللي لن انساه هو يوم ولادة ولدي (سلطان)
رزقت بطفل جميل
اللهم لك الحمد والشكر يارب
ربي عوضني في زوجي الاول وصبري
ربي رحمني في رحمتي لهذا الشايب اني وافقت عليه وهو مريض وبدون زوجه
ربي كتبلي الحمل في هذا السن وبعد 28 سنه زواج
26 سنه زواج من زوجي الاول
وسنه وحده فقط من زواجي بزوجي الثاني
وهذه صورة سلطان الله يحفظه لأمه وأبوه ويقر عينهما به ويعوض أمه عن ما فقدته من حرمان السنين
تم بحمد الله
تم بحمد الله
التسميات:
الإستغفار العلاج الأكيد لتأخر الحمل بإذن الله
بســــم اللـــــه الرحمـن الرحيــــم
أذكركم أخواني وأخواتي بآية عظيمة جدا
قال تعالى: (فقلت أستغفروا ربكم إنه كان غفارا، يرسل السماء عليكم مدرارا،
ويمددكم بأموال وبنين، ويجعل لكم جنات ويجعل لكم أنهارا).
فعليكم إخوتي بكثرة الإستغفــــــــــــــــــار
وأيضا الدعــــــــــــــــــاء والصدقـــــــــــــــــــة
وهذا ليس كلاما نظريا فقط بل هناك من اتبعوا هذا الدواء ونالوا المراد،،،
وسوف أنقل لكم بعض القصص دليلا على ما أقول:
* * * *
** انا اعرف وحده جلست 15 سنه ماحملت في الاخير جتها وحده وقالت لها استغفري
استمرت على الاستغفار وقراءة القران شهرين بعدها حملت
كذلك قالوا لزوجها الحل لمشكلتكم طفل الانابيب غير كذا مستحيل يكون حمل
واللي قال هالكلام الدكتور محمد بقنه في مستشفى قوى الامن
لكن زوجها سال الشيخ وقاله طفل الانابيب من الشبهات لان لو صار خطا طبي ممكن يكون كالزنا والعياذ بالله
قال زوجها من ترك شيئا لله عوضه الله خير منه
والحمدلله عوضهم الله وحملت زوجته بعد ترك جميع الادويه
ماشاء الله لاقوة إلا بالله
///
** فعلا الاستغفار له قيمة عظيمة في تفريج الكروب والهموم والحسنات الكثيرة فعلا
والله العظيم يا بنات ان قريبتي كانت ما تنجب جلست 16 سنة ماتنجب تخيلو وما خلت ولا مستشفى
ما راحتله ولا فيه فايدة
تقول وانا كنت جالسة سمعت بالتلفزيون شيخ يتكلم عن ثمرات الاستغفار في تفريج الهموم
وجلب الرزق والغنى وكذلك البنين
فالله سبحانه قال في كتابه العزيز الحكيم:
“فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا(10)يُرْسِلْ السَّمَاءَ عَلَيْكُمْ مِدْرَارًا(11)
وَيُمْدِدْكُم ْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا(12)“
ما ارحمه سبحانه تقوول لما تفكرت بالآيه على طول تركت الحبوب والأدوية واتكلت على الله
واجلس استغفر بكل وقت وانا آكل وانا أشرب وقبل ما انام تقول بكل وقت وانا نفس الشيىء ملاحظتها
سبحان الله جلست فترة قصيرة وحملت الله اكبر سبحان الله العظيم والحين ما شاء الله عندها ولدين وبنت
ينبغى ان يكون جل اهتمامنا بالاستغفار وذكره سبحانه .
///
** في قريبه لي كان ماعندها ذريه(دائما تسقط)وذكروها بالاستغفار
استغفرت هي وزوجها............ والحمد لله رزقت ببنت بعد سنين من المعانات.
///
** بداية انا تزوجت قبل ست سنوات وكان نوع إمتحان الله لي بتأخر الإنجاب الحمدلله......
بحثت كثيراًعن العلاج داخل المملكة وخارجها ..
وعلاجات شعبية ولكن لما يقدر لي الله الحمل ...
ولكن كنت على يقين تام بنصر رب العالمين وأني سأرزق الذرية ولكن ليس الآن....
يأست من الطب ولكني والله مايأست من رحمة ربي وعلمت أنه ارحم بي من أمي ولن ينساني ...
وبعدها بدأت اصحح تفكيري والجأ لله أكثر وفهمت الرسالة بأن الله ابتلا البشر ليرى أيهم أحسن عملا ..
فكنت أكثر من الحمد على الإبتلاء ..وافرح لأن الله أختارني فهذا دليل حب الله للعبد....
بإن يبتلية وكنت اتمنى أن يحتسبني الله من الصابرين رغم حرقة قلبي على طفل يلعب بحضني والاعبة....
ومن فترة توجهت إلى الله والعلاج بالقرآن والأستغفار...وتركت علاج المستشفى..
فكنت اصلي ركعتين وأدعي فيها ثم أقراء سورة البقرة وأختمها كل ثلاثةأيام مرة..
وهكذا لمدة ثلاثة أشهرأما الأستغفار فقد بدأت به قبل قرأت سورة البقرة بشهرين
وكنت اضل أستغفر في كل مكان وفي كل وقت وحتى وانا مع الناس الهي نفسي بلأستغفار عن الخوض في الحديث....
فزادني إيمان ورضا بالقضاء والقدر ..وراحة نفسية لم أجد لها مثيل والله العظيم ..
وحسن ظن بالله فكنت واثقة أن الله سيرزقني ولكن لم يحن الوقت ...
وبعد خمسة أشهر مرت سريعة مع بشائر من رؤىوأحلام تؤكد لي أن الله مع الصابرين ..
وأن نصر الله قريب...وفي وقت لم اكن أنتظر الحمل أو أفكر فية...
وإذا بي حامل خفت كثيرأ أن لا يتم ولكن الحمدلله على فضلة ونعمتة
رزقت هذا العام بأبن كالقمر وأدعوا الله أن يحفظه لي ويصلحة ويهدية ويرزق كل محرومة يارب
أخيراً اهتمو في هذا العلاج ولا تهملوه فهو من واقع تجربة ومثلي كثير...
* * * *
اجعلوا لكم ورد استغفار يومي مثلا 1000 استغفار يوميا،،،
لاتأخذ عشر دقائق أو ربع ساعة ولكن مفعولها أقوى من أي علاج آخر..
لاتأخذ عشر دقائق أو ربع ساعة ولكن مفعولها أقوى من أي علاج آخر..
= = = = = = =
الاشتراك في:
الرسائل (Atom)
